نئی دہلی: بھارتی حکومت نے فرانس کے ساتھ 26 رافیل میرین جنگی طیارے خریدنے کے معاہدے کی منظوری دے دی ہے۔ میڈیا رپورٹس کے مطابق یہ معاہدہ حکومت سے حکومت کے درمیان طے پائے گا اور اس کی مجموعی لاگت 63 ہزار کروڑ بھارتی روپے سے تجاوز کر سکتی ہے۔ معاہدے کو جلد حتمی شکل دینے کے لیے مذاکرات جاری ہیں۔
سرکاری ذرائع کے مطابق بھارتی بحریہ کو اس معاہدے کے تحت 22 سنگل سیٹر اور 4 ٹوئن سیٹر رافیل میرین طیارے فراہم کیے جائیں گے۔ یہ خریداری صرف طیاروں تک محدود نہیں ہوگی بلکہ اس میں فلیٹ کی دیکھ بھال، لاجسٹک سپورٹ، عملے کی تربیت اور مقامی سطح پر پرزہ جات کی تیاری بھی شامل ہوگی۔ اس اقدام کا مقصد بھارت کی دفاعی صنعت کو فروغ دینا اور آف سیٹ پالیسی کے تحت مقامی پیداوار کو بڑھانا ہے۔
بھارتی فضائیہ پہلے ہی 36 رافیل جنگی طیارے استعمال کر رہی ہے، جو امبالہ اور ہاشی مارا کے فضائی اڈوں پر تعینات ہیں۔ رپورٹ کے مطابق نئے رافیل میرین طیارے بھارت کے مقامی طور پر تیار کردہ طیارہ بردار بحری جہاز “آئی این ایس وکرانت” پر تعینات کیے جائیں گے۔ یہ طیارے بھارتی بحریہ کے موجودہ مگ 29 بیڑے کے ساتھ کام کریں گے، جبکہ مگ 29 طیارے بدستور “آئی این ایس وکرامادتیہ” سے آپریٹ کرتے رہیں گے۔
دفاعی ماہرین کے مطابق اس معاہدے میں زمین پر استعمال ہونے والے آلات اور بھارتی فضائیہ کے رافیل بیڑے کے لیے جدید سافٹ ویئر اپگریڈز بھی شامل کیے جا سکتے ہیں۔ اس کے علاوہ بھارتی بحریہ کو اپنے طیارہ بردار بحری جہازوں پر خصوصی آلات نصب کرنے کی ضرورت ہوگی تاکہ یہ طیارے مکمل آپریشنل صلاحیت کے ساتھ استعمال کیے جا سکیں۔
یہ معاہدہ بھارت کی دفاعی حکمت عملی میں ایک اہم پیشرفت ہے اور اس سے ملکی بحریہ کی جنگی صلاحیت میں نمایاں اضافہ متوقع ہے۔ رافیل میرین طیاروں کی فراہمی معاہدے کی حتمی منظوری کے بعد تقریباً پانچ سال میں شروع ہو سکتی ہے۔