ڈومینیکن ریپبلک کے دارالحکومت سینٹو ڈومنگو میں ایک نائٹ کلب کی چھت گرنے سے ہلاکتوں کی تعداد 184 تک پہنچ چکی ہے، جبکہ 150 سے زائد افراد زخمی ہیں۔حادثے میں جان کی بازی ہارنے والوں میں ایک صوبائی گورنر اور سابق میجر لیگ بیس بال کھلاڑی اوکٹیو ڈوٹیل بھی شامل ہیں۔ 51 سالہ ڈوٹیل کو ملبے سے نکال کر اسپتال منتقل کیا جا رہا تھا، مگر وہ راستے میں ہی دم توڑ گئے۔
واقعے کے وقت سینکڑوں افراد کلب میں موجود تھے، اور تقریباً 400 امدادی کارکن اب بھی ممکنہ طور پر زندہ بچ جانے والوں کی تلاش میں مصروف ہیں۔ حکام کو خدشہ ہے کہ اموات میں مزید اضافہ ہو سکتا ہے۔تاحال کسی کو بھی ملبے سے زندہ نہیں نکالا جا سکا، تاہم امدادی ٹیموں کا کہنا ہے کہ اب بھی کچھ افراد کے زندہ بچنے کا امکان موجود ہے۔ ایمرجنسی آپریشن سینٹر کے ڈائریکٹر خوان مینوئل مینڈیز کے مطابق، “ہم ہر ممکنہ جگہ کی جانچ کر رہے ہیں تاکہ پھنسے ہوئے افراد کے اہل خانہ کو امید دی جا سکے۔”
یہ سانحہ منگل کے روز جیٹ سیٹ نائٹ کلب میں اس وقت پیش آیا جب معروف گلوکار روبی پیریز اپنے کنسرٹ میں پرفارم کر رہے تھے۔ اطلاعات کے مطابق، وہ بھی ملبے میں پھنسے ہوئے ہیں۔ڈومینیکن ریپبلک کے صدر لوئس ابینادر نے اس المناک حادثے پر تین دن کے قومی سوگ کا اعلان کیا ہے۔